Widow-and-Orphan Stocks

Dul və Yetim səhmləri

Səhm bazarında çox vaxt diqqət mərkəzində olanlar texnoloji nəhənglər, sürətlə yüksələn startaplar və ani zənginlik vəd edən aktivlər olur. Lakin bu həyəcanverici mənzərənin kölgəsində, illərlə davam edən sabit gəlir əklif edən səssiz qəhrəmanlar da var. Onlara “Widow-and-Orphan Stocks” deyilir — yəni "dul və yetim səhmləri". Bu səhmlər, adından da göründüyü kimi, maliyyə sabitliyi axtaran, riskdən qaçan və illərlə davam edən gəlirə üstünlük verən insanlar üçün əvəzolunmaz seçimdir.

"Widow-and-Orphan Stocks" nədir?

"Widow-and-Orphan Stocks" – çox aşağı riskli, sabit dividend verən, uzun illər boyu stabilliyini qoruyan şirkət səhmlərinə verilən adlandırmadır. Bu termin, həyatlarında maliyyə təhlükəsizliyinə xüsusi ehtiyac duyan – dul qadınlar və yetim uşaqlar kimi – insanların rahatlıqla investisiya edə biləcəyi, səssiz, lakin güclü şirkətləri ifadə edir.

Bu tip şirkətlər adətən gündəlik ehtiyaclarımızı qarşılayan məhsul və xidmətlər təklif edir – misal üçün içki, məişət malları, səhiyyə və kommunal xidmətlər. İqtisadi dövranın enişli-yoxuşlu olması bu şirkətləri ciddi sarsıtmır, çünki insanlar onların məhsullarına həmişə ehtiyac duyur.

Bu anlayış ilk dəfə 1930-cu illərin Böyük Depressiyası dövründə yaranıb. O zamanlar bir çox ailə başçısı işsiz qalırdı və minlərlə qadın ailəni təkbaşına dolandırmaq məcburiyyətində qalırdı. Onlar üçün təhlükəsiz, stabil və davamlı gəlir mənbəyi həyati əhəmiyyət daşıyırdı. Banklar inamsızlıq yaradırdı, iqtisadiyyat qeyri-sabit idi, lakin bəzi şirkətlər var idi ki, dividend ödəməyə davam edirdi.

Beləcə, bu şirkətlərin səhmləri — riskə dözümsüz, amma güvənə ehtiyacı olan insanlar üçün maliyyə dünyasının sığınacağına çevrildi. Bu termin zamanla maliyyə ədəbiyyatında yerini aldı və bu gün də aktual olaraq qalır.

Coca-Cola (KO), Johnson & Johnson (JNJ), Procter & Gamble (PG), Duke Energy (DUK), Verizon (VZ) kimi şirkətlər Məşhur "Widow-and-Orphan Stocks" Şirkətləri hesab edilir.

Bu şirkətlərin ortaq cəhəti odur ki, milyonlarla insan onların məhsul və xidmətlərindən hər gün istifadə edir.

"Widow-and-Orphan Stocks" yalnız maliyyə göstəricilərinə görə deyil, həm də psixoloji rahatlıq və sabitlik verdiyi üçün investorlar üçün çox cəlbedicidir. Bu səhmlər həmçinin diversifikasiya üçün idealdır. Sürətli artım potensialı olan texnoloji səhmlərlə yanaşı portfelə bu tip "sakit güclər" əlavə etmək ümumi riski azaldır və balans yaradır. 2008 və 2020-ci illərdəki maliyyə böhranlarında, texnoloji və spekulyativ səhmlər kəskin dəyər itirdiyi halda, bu səhmlər ya sabit qaldı, ya da dividendlərini davam etdirdi.

Bu səhmlərə bəzən “sleep-well-at-night” stocks deyirlər – çünki sahibi onları düşünərək narahat olmur. 1950–1970-ci illərdə maliyyə məsləhətçiləri bu səhmləri rəsmi olaraq dul qadınlara və ailə başçılarına tövsiyə edirdi. Bəzi böyük fondlar bu səhmləri illərlə heç satmadan saxlayır, çünki uzunmüddətli stabil gəlir verir.

"Widow-and-Orphan Stocks" – səs-küysüz, qalmaqalsız, lakin maliyyə həyatını sabit saxlamağa kömək edən sakit qəhrəmanlardır. Əgər sənin hədəfin birdən-birə milyonçu olmaq yox, illərlə maliyyə azadlığına doğru sabit addımlarla getməkdirsə, bu səhmlər sənin üçün doğru seçimdir. Portfelində belə səhmlərə yer verməklə yalnız gəlirini deyil, ruhi rahatlığını da qorumuş olursan çünki bəzən səssiz səmirsiz sakit qazanmaq, stresli və səs-küylü riskdən daha dəyərlidir.

İstifadə olunan Mənbələr :

https://www.financestrategists.com/wealth-management/stocks/widow-and-orphan-stock/

https://talkmarkets.com/content/stocks--equities/10-widow-and-orphan-stocks-for-safe-dividends?post=373613

https://www.investopedia.com/terms/w/widowandorphanstock.asp

https://www.theglobeandmail.com/investing/education/article-these-widows-and-orphans-stocks-have-largely-escaped-the-market/

https://finance.yahoo.com/news/11-best-widow-orphan-stocks-070446467.html